我喺幸褔手作館度買嘅係一個皮花球。喺我用咗嘅眾多婚禮服務當中，我最滿意就係呢個花球！我喺搵到有得訂皮花球嗰晚已經開心到瞓唔著覺。 基本上我都係whatsapp聯絡佢哋，同佢哋講自己想要啲咩，然後佢哋就會幫你做。其實我影prewedding時已經喺佢哋度買咗一個花球，但好不幸哋喺影完相返嚟嘅時候就俾啲行李壓偏咗。我當時真係好唔開心，就向佢哋求救。負責人阿寶真係好好人，又盡心幫我。阿寶佢聽完我講之後就話幫我扎過一個新嘅，而且只係收返我$200材料錢，無再收我人工。所以我覺得呢間店雖然係小店，但真係好有人情味，真係唔係只為錢而係為你著想。 我真係好鐘意呢個皮花球，又靚又有紀念價值！

呢一間店喺我一位好朋友開嘅，佢做啲手工真係好靚，我成個婚禮入面好多嘢都係佢幫我handmade。例如花車車頭對公仔嘅花、所有長輩同兄弟姊妹嘅襟花、教會reception張枱上面有個雀籠、簽名筆、人名嘅英文字母嗰啲都係佢一手一腳設計，又縫又貼。 花車車頭我哋只係預備咗2隻公仔俾佢，佢就設計好一堆託住一對公仔嘅花一齊放喺車頭做裝飾。教會reception枱度用嘅人名嘅英文字母我哋就交咗啲喺cotton on度買嘅白色字母俾佢，佢就幫我哋就返個婚禮用粉紅色同花呢個主題，喺啲字母度加工同裝飾。就連放戒指嗰個小枕頭佢都有就住成個婚禮嘅主題設計埋。我覺得佢真係好用心，又同我一齊傾，希望可以搵到一啲我鐘意嘅材料去做設計。 我有其他朋友見到佢幫我做嘅設計之後都有搵佢做設計，大家啲feedback都覺得佢做野好快，有交帶同埋覆得好快。而且佢唔會亂咁放自己鐘意啲idea落去，佢真係會做咗啲之後就俾你睇，再同你傾下呢啲係唔係你想要嘅嘢同感覺先再繼續做。我覺得佢真係好比心機做每一個detail同埋希望嗰一樣嘢真係做到你心目中最想要嗰個效果。