搵backdrop decoration 嘅時候我哋都無咩方向，只係上網靠睇相見到感覺啱嘅就去傾吓。最後揀呢間Simply Elegant主要係因為佢嘅設計感覺比較簡單，比較適合我哋。 一開頭上去傾都好OK，跟我哋嘅designer都好open-minded，好似好get到我哋想要咩，好快就攞晒紙筆出嚟畫吓嘢。由於我哋無咩方向，所以只係俾咗少少element 佢，例如係想要咩色，要布定print嘅backdrop 嗰類。雖然我講到好含糊，但佢第一次出俾我哋嘅稿都幾貼近我哋想要嘅方向，當時都覺得只係有少少嘢要微調就OK。點知愈tune就愈唔係我哋想要嘅嘢，我哋都唔明點解會愈來愈偏咁奇怪，於是改多幾次後我哋就覺得都係要約出嚟再傾清楚個方向。 上去同佢哋傾嗰時，佢哋就同我哋講用布其實係有啲limitation，所以就有機會愈tune愈做唔到我哋想要嘅效果，於是我哋就諗住轉用print嘅foam board。其實當時唔夠2個月就係我哋big day先嚟改呢個大方向都真係有啲擔心，不過諗住始終大家出嚟傾清楚應該會好啲，點知到新嘅稿出咗又唔係嗰一回事！於是我哋又來來回回就住新稿改咗幾次。可能因為佢哋覺得已經幫我哋改咗太多次，之後佢哋就轉咗搵另一個customer service manager去跟我哋嘅case，唔再係designer。我哋覺得主要係傾完第二次後佢又唔跟同我哋agree去做，所以先又要再改好多次。不過因為我哋都覺得時間實在好趕，後來都accept個稿繼續去。 到big day前唔夠1個月，個manager就打俾我話原本個package 包嗰個size嘅backdrop唔夠cover酒店個台上面有嘅LED backdrop。當時佢俾咗2個option我，一係就俾錢加大個backdrop，一係就用布遮咗佢。嗰刻我個experience真係好差，覺得好似依家先嚟咁樣夾我錢。因為酒店contact我一早俾咗，佢又唔早啲去睇場，到宜家先同我講package size係唔夠大，我亦都無時間再搵另一間公司再做。除此之外，佢哋又俾好多excuse，例如話早幾個月幫其他客喺嗰度做未有LED牆， 但其實一年前我去過嗰度睇場時已經有LED牆喺嗰度。雖然要跟住個尺寸嚟加都唔係加好多錢，但其實到嗰時我加過嘅錢已經同原本package嘅數差咗幾多(由9千幾加到萬六)。我覺得如果係reasonable嘅真係唔介意加，問題係佢哋呢個咁緊急嘅時間先嚟用一個咁嘅方法要我加錢真係好唔appropriate。另一方面，我覺得嗰個CS manager啲態度都唔係咁好，同佢傾親嘢都好似喺城市論壇度拗嘢咁，講到2個人把聲係疊住晒。最後我都要佢哋agree加尺寸嘅錢係一人一半咁分，因為我覺得一早佢哋唔去度同睇場真係唔係我嘅責任。態度唔好仲要將啲責任推晒喺客人身上呢一點我就唔係咁滿意，我覺得如果佢哋態度好啲，或者有商有量的話我感覺會好好多。 最後佢哋整出嚟嘅backdrop手工係唔錯，好多賓客都同我講覺得好靚，都係我哋想要嘅嘢，只係中間嘅過程令我哋唔係好開心。最估唔到嘅係完晒成個婚禮之後佢哋嘅staff仲邀請我去佢哋facebook度like and share。真心地講我覺得佢哋嘅手工quality真係OK，但係成個過程之後我真係講唔到啲咩好說話。