因為我自己住馬鞍山，想搵個地點係方便返屋企人，而且我哋擺嘅圍數都多，所以就揀咗場地比較大嘅科學園嘅Club One。佢嗰度都可以擺到50圍，我哋最後就擺咗41圍，場都好夠寬闊，41圍都唔會覺得逼。去睇落場同落訂嘅過程都有向我哋介紹返有咩套餐同幫我哋upgrade咗啲嘢，例如係食物方面幫我哋upgrade啲鮑片。 我覺得嗰度各樣service都算OK，唯一係覺得好多嘢要自己做，如果可以有個保姆角色跟新娘跟得貼身啲會較好。

因為我鍾意草地，Club One 科學園本身個場個backdrop已經係一個草場，唔洗搵錢去整。其實本身我係諗住要證婚服務，咁變咗證婚場地都ok。同埋佢個場地夠闊落，雖然有幾支柱係爭啲，因為唔係好襯；其實我都知道場地好盡力去遮嗰幾條柱，但係冇辦法，個結構係咁樣，都冇得拆咗條柱，但係整體係ok嘅。 而佢哋服務都唔錯，因為我嗰度個婚宴佢都包咗個婚禮統籌俾我嘅，但係人事變動呢啲冇得避免，佢中間轉咗一次人。我初初都擔心轉咗新人之後個交接會冇咁好，但係都pick up得好快同埋追返哂之前啲嘢，可能每個婚禮都差唔多，但個outome我都滿意。 我冇食過嘢所以唔知食物質素係點，但賓客反應都ok。同埋佢有個新娘保母嘅妹妹跟住我，都會提我要做啲咩，拎漏咗花球又會幫我，都幾好。作為過來人，我覺得揀場地，自己鍾意真係好緊要，無謂揀個自己唔鍾意嘅。總有啲人係長輩覺得想中式就揀中式，但呢啲其實都係自己嘢，要揀自己鍾意嘅。