我哋揀科學園Club One係因為鍾意佢個場夠開揚，因為香港哋除咗價錢要相宜，又要開揚，我估都係得返Club One嘅郵輪碼頭同埋科學園揀。最後揀咗科學園，因為近我老婆嘅親戚，佢哋住上水。 我哋差唔多結婚一年前去搵佢哋，因為驚佢哋冇位又miss咗婚展，所以係直情去現場搵佢哋啲staff傾。因為我本身係用hotline搵佢哋間嘢啲sales staff，佢哋都好好咁將我refer咗俾會場負責嘅經理，啲經理都好熱心，我未做佢哋個客，一蚊都未俾，但係問佢九萬幾樣嘢佢都答我九萬幾次。其實我哋都幾麻煩，又冇睇過婚展冇睇過啲相，咩都唔知，就當咗佢係婚展啲staff咁問，佢都完全解答哂我哋，亦都好樂意約我哋去睇場同開會，睇哂所有嘢知道哂先拍板簽contract。 呢度嘅場地環境同食物質素我哋都好滿意。場地好闊落，可以擺到五十幾圍，但係我哋只係擺二十圍，到咗Minimum pay就算唔係太多圍數，佢都俾我哋包場，呢點真係非常之好！而且，佢出面證婚個位真係好靚，不過當然天氣要許可，嗰個位係日光照落嚟真係好靚，真係一絕！嘢食我哋都覺得好滿意，因為我哋當日冇食到，當晚都冇食到。但係佢哋好好，會知道我哋新人同父母都好忙，冇時間食，佢會幫你存菜，將你嗰份直情連檯都唔上，直接pack好哂入盒俾我哋拎走。我同我老婆媽咪都係拎走啲嘢食返屋企食，已經係凌晨兩三點，但係我哋凍食都覺得滿意，熱食應該係好好。聽返啲賓客嘅feedback都係中上至好，所以我都覺得滿意。 如果要再improve，我覺得交通可以再好啲。因為佢哋啲shuttle好疏，同埋時間延長都係要加錢。但係要明白佢個位都比較偏僻，如果住市區啲人入去都係靠shuttle，佢哋啲shuttle半個鐘一班，如果可以再密啲就好啲。同埋散席架車都係，本身default就係十圍一架，但係都好多人唔夠位坐，如果交通方面安排得好啲就會更好。好在我哋有啲賓客直接飛的走，所以都安排到。 我哋都有用埋佢哋啲司儀，司儀已經好早announce關於shuttle嘅安排，佢哋都知道哂如果賓客選擇搭shuttle嘅就會早啲走。呢方面司儀都好好，知道哂個程序，安排得好好！。