我係喺facebook度睇睇吓見到Feel in the blank呢間店，覺得好似幾啱就click咗入去睇。一路睇佢哋啲相就覺得真係好中我心目中想要嘅比較moody同有菲林感嘅風格，就決定再聯絡佢哋傾吓。不過佢哋價錢都唔平，book 2個P都係貴過出面2P1V嘅package。 其實我哋搵Feel in the blank之前係搵咗另一間攝影公司影pre-wedding，本來諗住搵佢哋影埋big day。其實一開始時我哋都覺得呢間公司嘅相幾creative，唔會係啲人排排然後就影嗰種，會有跳躍、搞笑同有主題。不過到我book咗佢pre-wedding加big day嘅時候，我就發現呢間公司影相嘅質素好似有點每況愈下。我覺得喺我confirm之前佢都keep到水準，或者真係好靚嗰啲佢先放上facebook，但漸漸地佢啲相感覺好似有點假，好似key咗啲藍天白雲嘅感覺。後來喺我哋影完pre-wedding之後，我就決定再去搵下其他攝影公司，因為感覺唔係咁啱。之後我再去睇過好多間唔同嘅攝影公司，不論係大定係小店，都搵唔啱。直到big day半年前我就終於搵到Feel in the blank，當時我哋２個都覺得真係啱我哋風格，就決定撻訂都轉過另一間。其實原本嗰間pre-wedding都影得OK嘅，不過佢哋都話如果我哋喺唔鐘意呢種風格嘅就唔好夾硬影埋big day，於是佢哋就喺我哋俾嘅訂金裡面俾返一半錢我哋。 上到去Feel in the blank第一次見到Jan，覺得佢幾誠懇同幾正經，可以溝通到。到結婚前上去再傾時，反而就覺得佢好風趣，會講吓笑，到big day嗰日大家都好盡興。佢知我係傻傻哋，同埋我老公都好玩得，所以有時我哋都會同佢互寸吓。我哋都覺得佢係一個好有心嘅攝影師，嗰日其實我哋啲時間控制得好差，好多想去影嘅地方都去唔到，Jan都同我哋講會盡量去幫我哋影，但到某啲時間就提我哋真係要決定放棄一啲嘢，例如喺影花車定草地。雖然佢係咁講，但我揀完之後佢都會盡量幫我喺無揀嗰邊影返一兩張，其實令我覺得好放心咁跟住佢同交俾佢影。 當日仲有一個位係我好記得好好笑，就係證完婚之後，Jan就話不如試下同你老公一齊舉無名指啦！我因為舉唔直隻無名指，就舉咗中指，佢就話︰「唔緊要呀！照影，照玩！最緊要開心！」到嗰張相出咗嚟同埋same day edit都出咗呢張相嘅時候，大家睇到都話真係好搞笑，我哋都好開心！雖然暫時嚟講我未收晒相，只係睇咗十幾張，但我覺得佢嘅相好有西方感、有mood，同埋啲相睇落係有故事性，我同我老公都好鐘意。