我地行婚展見到呢間，當時好快就「落咗疊」，因為我哋坐咗埋去後就走唔甩，坐咗成個幾鐘，佢又sell得好勁。一開始埋去嘅時候，佢問我哋有無想去邊度影，嗰時我哋未諗到，佢就俾啲相簿我哋睇。到我哋終於講到比較鐘意日本，想去影櫻花之後，就一輪咀係咁向我哋介紹有咩package。當然都有講過話等我睇多幾間先，因為去婚展之前無乜做research，唔係太知個價錢係適中定貴。但佢就問我concern啲咩、有咩問題，係風格、衫定化妝。佢又講得好有技巧，令我哋好難走，於是最後都confirm咗。 後來上去同佢哋開會，我就覺得佢哋真係好多隱藏收費，好多嘢要我哋加錢。去日本租車要加$2500一日(8個鐘)，攝影師做埋司機，去到時啲錢係直接俾攝影師，仲要俾攝影師同化妝師嘅酒店錢18000yen/人。(後來我哋去到當地，其實只係坐4個人的細車，我哋上網睇租車網都唔使咁貴一日~ !佢一定有賺!) 然後排日本外影schedule，我哋揀咗地點俾佢哋排schedule就排咗12個鐘出嚟。基於原本個Package只包8個鐘，一超過8個鐘就要每個鐘加錢。但我哋之前已經加咗幾樣嘢，所以已經唔想再加錢，就決定減行程減到8個鐘以內。 另外，佢哋之前話日本外影package會送喺香港影相嗰部分，其實只係送三個鐘攝影。我心諗，三個鐘影到啲咩丫，化妝set頭都無咗啦，仲要影街景就實over time，於是我哋都加$3000加咗2個鐘($1500/鐘)，因為唔加根本直頭係唔會影到。點知香港嗰部分因為天氣關係，我哋改咗期幾次都唔得，我怕天氣太熱會影得好辛苦，就問佢哋可唔可以轉喺studio影。但係轉book佢哋studio嘅話竟然又要加錢，一個鐘要過千！於是我自己出去book咗2個鐘出面啲studio，2個鐘先$1500，仲要自己準備車，車埋佢啲人過去先唔使收車費。一開始婚紗展嗰時個package係$16800，最後出嚟我哋Total係$26000。 講返影相嗰方面，我覺得最大問題係佢哋啲衫真係好唔得，款式少，唔靚同埋舊。雖然影出嚟都唔多覺，但黑黑黃黃都唔係好想試。喺婚展時相簿睇就好OK，但上到去揀衫，真係又殘又舊，好污糟，好勉強咁揀先揀到一條啱。佢哋又無ipad相簿，係全部就咁掛晒喺度，要靠佢哋幫手問吓你想要咩款再攞出嚟俾你睇。 至於去到日本影相，其實當初傾好嘅景點最後去到影都唔係好同，因為攝影師話我哋揀嘅某啲景點櫻花未開。雖然結果去影嘅地點都真係開滿櫻花，但就唔係啲特別嘅景點，會係啲普通嘅公園之類。攝影師有教我哋pose，但教來教去都係嗰幾款，變咗影出嚟就係唔同景點都係同一個pose咁。化妝師都算跟得好，做埋半個攝影助理，又幫我捧裙同攞道具。當日我哋準備好晒出得去影都大約11點，影到夜晚8-9點先完，不過呢部分over咗8個鐘就無叫我哋加錢。 到第二日我哋去揀相，竟然影咗咁多個鐘只係得2百幾張相。職員就話因為攝影師會將影得唔好或者貶咗眼嗰啲cut咗。但係我真係睇相嘅時候，我發現有幾個景點係一張相都無！因為當時攝影師唔喺度，我去問個職員點解會咁樣時，佢就去mark低係邊幾個景點，再幫我去問攝影師，第二日再覆我。攝影師話過相嘅時候過漏咗，但其實之後過返嚟都係多咗十幾張左右，仲要唔好多要得，大部分係影得好暗或者啲我哋都未ready影嘅樣。不過最誇張係有一個景點直頭只得1張相。 相片質素方面，全部soft copy有俾我，再包日本嗰度執30張，香港執10張，但係本身俾得我睇嗰啲相已經唔係十分之好。執相都只係執肥瘦同顏色，相裡面有路人甲乙嗰啲都唔會幫你執。每一張相要大執就要加$180。

因為本身我對與big day攝影呢樣野真係完全無頭緒，所以係婚展見到wedding birds既相唔錯，價錢又ok咁就揀咗佢地。 我老公本身住黃竹坑既，咁後面就係南朗山，本來我地個package係無包外景既，但我老公個陣就話都想去個邊影幾張山景相，咁我地一去到，佢地兩個攝影師就即刻爬上去山個度去幫我地影，其實個度唔係有條靚既路比人行，只係好似水渠個d路咁，見佢地一隻手拿相機，一隻手扶著咁就衝上去，個刻我就覺得好震撼好深刻！ 不過，可能因為我結婚個日朝早6點佢地已經standby，所以一上到車就訓著，本來我想影下行過去車既相，但後來要我既兄弟提返佢地先幫我地影，如果主動啲就更好！