呢個package係我哋第一次去婚展嗰時book嘅，嗰時啱啱訂婚，乜都唔知，喺天橋嗰度有個台灣人問我地想唔想去台灣影pre-Wedding, 咁岩我哋又真係想去台灣影喎，佢問我地要唔要免費飛，我哋就話要囉，咁就俾人帶咗入去最佳風情嗰度sell啦～ 佢講到好似比好優惠嘅價錢我哋咁，（一開始其實我哋冇講嘢佢就已經喺度減價，所以catalog入面嘅價錢一定係假的），越講就越平。

跟住開始認親認戚（後尾發現係台灣人常用消售手法），不過嗰日之後都冇再見過位呀姐。我哋都有問清楚有冇啲咩額外收費，佢都好坦白同我地講，而事實最後都真係只有嗰啲物品有額外收費（OT, 安瓶，租車...）。傾傾下佢又問你做唔做樣板，再做平啲比你。但離開咗就唔會再比呢個價你，所以一定要依家落訂。

其實我覺得佢啲攝影風格都只係一般般啱自己，佢啲作品 Saturation 比較高，同埋風格比較誇張，但阿姐就喺度氹我話攝影師會就我風格去影。 其實book完之後我成日都好後悔，好應該睇多幾間先落訂，或者至少睇多幾間網上review（佢fb啲嘢睇上去好似好假）。我發覺呢間公司嘅資料都比較少，所以影之前擔心左好耐。我嗰日之後又死心不息咁去咗好多檔到問，好想知我哋係咪真係買得平。結果發現其實真係唔係，有啲鋪頭真係可以講到再平啲，仲有埋全檔（我冇），風格上又比較啱我。但冇啦，都已經book咗。 就係咁，好忐忑咁過咗幾個月。我哋終於飛去台灣影相。我哋個package本身係冇包酒店，我就自己book咗間係附近嘅酒店（住得近係好重要！）。嗰邊嘅服務員都好好！

我個plan係一件婚紗，兩件晚裝，但係我試衫試好耐佢都毫無怨言。成層得我一個人喺度試，好有私人度，任我地影相。同埋我外拍，佢都會比我揀啲長拖尾（喺香港影嘅時候，另一間公司係咁說我揀輕婚紗。）。不過啲衫真係一般般，始終係pw衫，比較殘，不過影出嚟唔會覺。我亦都留意唔到佢一開始sell我時候講嘅「分區收費」。不過唔緊要，我都揀到啱嘅衫嘅。然之後就攞去改，我以為改衫要一晚，點知落到去是比婆婆睇，婆婆叫我企係個更衣室度等等，我就着住個nubra企喺度等佢，等左一陣佢就已經攞咗條改咗嘅裙返入嚟！ 我真係超級驚嘆佢改衫嘅神速！同埋幾好嘅係，佢改完你仲可以再試，唔啱佢可以再改（雖然我改一次就已經OK）。跟住我哋就過隔離街去試男禮（應該係合作或者係外判公司，不過佢會改完衫第二朝send過去鋪頭，唔使我哋特登去拎）。禮服款式好有限，但俾我睇過一啲公司只有黑白色好少少。佢外套白色有兩款，黑色兩款，一款係藍色，一款係紅色。西褲就得黑同白。結果我哋有加少少錢租多咗件vest,等男朋友多少少造型變化。

跟住就同攝影師見面，傾吓我哋想去邊，俾咗啲意見我哋條路線。我俾咗我啲鍾意嘅風格佢睇，佢都有參考同埋影咗啲我哋想影嘅pose。本來話要同化妝師都見一見面，點知佢唔記得咗，結果我嘅地傾電話，（我普通話又唔係特別好，傾得有啲辛苦）。但係鋪頭職員都有俾啲妝頭嘅相我睇，我揀鍾意嘅，佢再send返俾化妝師。 第二朝一早，就去返佢公司化妝，衫都ready，喺晒佢度換，我覺得係幾方便。化妝師都化得好細心，我要求自然啲似番自己，雖然最後個妝比較濃，但係我覺得都係自己樣，滿意。化妝師好好，全日影相期間都會不停幫我補妝、撥頭髮，轉妝頭都真係有轉同用心做。助手同攝影師都好賣力。我地個攝影師應該係洪sir。佢不斷教我地擺pose，仲係咁講廣東話😂。仲有助手打燈同揸反光板，成件事好Pro！佢仲成日幫我地鋪好條裙，make sure長拖尾唔係一嚿嚿。整體感覺都唔錯！景點都好靚，天公造美，同埋感覺去咗好多地方，所以嗰日其實真係幾開心！

最後一日揀相，我哋都揀咗好耐，因為佢影咗300幾張，我哋只係要20張做細相簿，職員好好仲幫我地準備咗珍珠奶茶！一開始睇，睇到好多好好笑嘅相，例如新郎僵硬表情、自己傻笑、奇怪pose (我擺的時候都好好奇會好看嗎😅）。同埋風格始終易改，最後啲相都係好似婚展嗰時睇啲sample,比較誇張同色彩鮮艷。以為好易揀。點知都有唔少好好嘅相，有啲日落相一開出嚟我哋兩個都嘩一聲，啲顏色真係影得好靚。好不容易精挑細選終於揀咗20張。其實我一直都好想要電子全檔，因為都係一個好快樂嘅回憶。跟住我哋就問佢可唔可以買返晒，要幾錢，仲同佢講價。最後真係可以買返晒，俾佢一開始講個價錢平，不過都係貴，所以男朋友唔太開心。 一開始喺婚展傾，佢有講過話如果我哋喺台灣留多一個禮拜，可以攞埋個大畫布返香港，比少啲運費。嗰日問返佢啲職員，都真係可以做到。佢哋即時將我哋揀咗張相send俾執相嘅人，好快執完醒返返嚟，我哋ok佢哋落去做畫架，約好咗時間我哋返香港之前過去拎。我哋返咗香港之後一個月倒，佢修完啲圖都有好快俾返我哋睇，第一次執得有啲Hea，我哋睇咗要執，佢都再跟我地要求第二次執返俾我哋。暫時一個月後到，佢未問我相簿排版啲嘢，所以之後啲products 嘅嘢，我就無可奉告了。

最後埋單成個價錢比一開始個plan貴差不多一倍（我自己係有心理準備的），如果一開始揀個package本身已經有全檔，我哋就唔使比多咁多錢。但係整體上來講，我覺得唔完美，但都係OK可以接受的。

當日行路過天橋去expo既時侯就俾個男人截住問我地係咪去expo，想唔想要免費飛。我地心諗還點都未買飛就跟咗佢入去。入到去佢就帶咗我地去佢地個booth到，就放低我地俾個sales。 個sales係一個台灣男人，真係一個郎過油，好sales既sales。佢真係精警，我地一坐埋去，佢就同我講話“哦新娘子，妳真的好美哦，拍照一定很上鏡！不如我現在找妳做2014樣版人選cover girl，因為做到我們的樣板人選就會得到我們很多的優惠，也因為是樣版人選，我們會安排最好的攝影師幫妳們拍照。”我就係因為呢個“樣版人選”同埋一個好吸引既價錢join咗佢地喇。我仲記得當日佢仲offer咗一個台灣攝影地道小吃任吃既優惠，諗起都好笑，而其實當日當妳影緊既時候根本就無時間同心請去食小吃架喇。其實佢地都唔係亂up既，有啲優惠都真係優惠嚟既。例如好多攝影公司都冇包影夜景同煙花景既，咁我地真係有既，嗰都加咗嗰妝同加咗時佢地都無加我地錢。其實佢sell我話我係covergirl我都okay既，不過真係因為我地係錢行先，佢講到個價錢我地就覺得有興趣。又話包5套衫，可轉5次妝，全日拍攝不限時間，不限景點連酒店都包埋都係＄13000到。 Confirm完之後就要同香港既接洽去時侯既安排喇。嗰個就差啲，真係妳唔叫佢佢唔會主動做嘢。唔會主動打嚟同妳溝通，好似話臨行前要帶啲乜嘢都無主動同妳聯絡，email嗰啲都係妳叫佢book房佢就book，其他乜嘢資料都無提供。希望佢可以主動多少少。 去到當地就即刻去揀衫，男女裝都係即日揀好。佢地有好多款，改衫好快手，嗰個台灣阿媽真係好勁，快到差唔多5分鐘一套！揀好衫之後就夜晚返去同攝影師開會，當中就傾想影乜同去邊到影，然後就見化妝師同佢開會傾妳想要乜造形。隔日一早就返去，即刻開始化裝，過程好順既。 酒店唔得，唔好期望太高，簡單啲講得三星，房細同埋舊，但係都乾淨，包早餐，而且離佢地workshop好近，行過去就得，所以都方便去試衫同第日一大早去化妝。都算okay。影既時候真係好落力，好pro好俾心機，一隊三個人加埋司機四個人。司機剩係揸車唔做其他嘢，而嗰三個真係好落力，一攝一化妝一助手。個助手就係夜晚set煙花嗰個人。個助手都好貼心，見到我老公笑容有啲硼緊，佢會係側邊嗌“老公加油！笑，繼續，堅持，好呀！”，時不時有叫我老公收肚，真係响旁邊希望我地啲相既質素出嚟好，過程係幾開心既，我地只要做好我地既表情就得喇。講返食，妳當時會係著住禮服係啲小店到食，佢真係任你地食，如果妳話要食三碗飯佢都會俾妳食，但老實講妳係唔會食因為真係無時間既。 到咗第三日就係揀相。揀相我地係加咗錢做排版同埋加咗啲相，因為我地當初傾package既時候係無諗過相係會無排版既，呢點各位準新人真要aware同埋要問清楚。而計埋景點入場費（要自費），仲有就係走嗰日因為台北落大雨，而幫我地叫車去台中嗰程車都係要我地自己俾既，加埋其他小費俾化妝同助手加埋就＄4000。Anyway揀相可能我地真係好挑剔，我地真係篩走咗好多相，老實講質素唔算太好，揀完本來唔加買，但係佢地又話俾平啲價錢我地買多幾張，咁我地就再重睇揀多啲。在我嚟講，其實50幾60張相，裡面好既有十張到就已經okay，晒出嚟就好好。其他買咗既我都只係買嚟留念。拾相都okay，back and forth幾次都無話嫌煩，好細微都有幫我地搞，都做到我地想要既，整體效果都唔錯既。 整體嚟講對化妝有啲意見，其實化既時候化妝師係有同我講話影pre weddding個妝同婚禮當日現場睇係有唔同既。但點都好，見到相我發覺相裡面同我真人係唔似既。好多見到相既人都話認唔到呢個係我嚟既。可能係佢地覺得係相裡面睇個妝要濃啲而我自己唔慣喇，真既，化妝係好個人既，所以好難講既。