其實一開始搵場地擺酒我都睇咗好多，但始終十七圍左右就比較難搵，因為好多場會有最低消費要包廳，我自己又想去酒店擺。嗰時我同我老公有行婚紗展，見到好多唔到場地都有擺攤位（Marco Polo嗰啲都有），但始終睇唔到個場係點就好難揀，因為我老公比較高，如果樓底矮佢就會好辛苦。 我主要係搵尖沙咀，佐敦嗰一帶。嗰時第一間睇九龍富豪，就覺得嗰度地氈比較殘舊同樓底矮（嗰時係15年，我唔知佢宜家有無裝修咗），個場地感覺唔係太華麗，所以就無再睇菜單。之後再去Holiday Inn，就俾咗地庫個廳我哋睇。嗰度感覺都好靚又好新，可惜樓底就唔太高，好似有啲侷促感，於是又無揀到。最後再上網睇，見到Eaton個樓底幾高，就再去睇場。去到睇完個場，覺得樓底幾高，感覺個氣派都好啲同埋精神。之後Sales就再同我講吓有咩plan係嗰時做緊，我返去考慮咗一日之後就返去俾訂。不過我覺得佢哋啲收費都幾海鮮，唔會一開始就好清楚咁列晒啲收費俾你睇。之後再慢慢坐低同佢哋每項嘢慢慢傾時先好似再同佢攞嘢交換咁。例如佢package包咗花車，但我哋有自己預備嘅，所以我哋就退返張coupon，換提早開始供應餐前cocktail同小食（原本要加錢）。至於價錢方面我就有啲唔開心。因為我喺一年前已經book好，後尾我喺第二個platform度識咗啲都係同一間酒店3月擺酒結婚嘅人，先知佢臨尾急住放啲唔好嘅日子就免加一同送其他嘢。大約係10月賣下年3月嘅期，送加一又送candy corner。都明白佢哋係為咗生意，但我自己知道之後就唔係咁開心，不過我都無同嗰邊反映或希望佢哋送返啲嘢之類。話晒佢同出面價錢唔係差好遠，我加埋一計晒全費都要約一萬一圍，三至四星級酒店嚟講就唔係話超值。 不過結婚當日各個staff都好盡責，特別係幫我拖裙嘅女仔真係又好又盡責。到我哋成晚完咗佢仲送我媽媽落樓下，所以我哋之後都額外再封咗封利是俾佢。

Eaton 其實都okay既，不過佢哋啲Sales真係轉得好快。嗰時sell我嗰個同事叫Michelle，後來佢轉咗工之後就叫個Trainee嚟跟我哋張單。雖然佢話就話係Account Manager，但係問問吓真係乜都唔識好似以前做另一行咁，問乜嘢都話要轉頭覆我。例如我哋個ballroom話就話maximum係18圍，咁我就想問下有無啲走棧位可以加多一圍，又話者有無其它場地可以轉，佢問乜都話要問吓然後好耐先覆我哋，啲答案又好唔firm，根本幫唔到手。其實我哋見服務係咁都試過send email俾佢哋個唔知係Director定係Senior既同事，但係 一路佢哋都係無覆過我既。佢雖然無覆我，但我好肯定佢有收到我啲email，因為每一次我send email 俾佢，轉頭個trainee 就會打嚟問我咩事。其實我都根本唔洗想搵個trainee，但係總之就係佢唔會親自覆我啦。 我哋嗰package係包一晚套房，但係房間安排都唔算太flexible，因為我哋成11:00幾先出門，咁我哋就早幾日問定睇吓可唔可以大概中午要到間房諗住可以當做男家回門用，點知佢哋就覆我話唔confirm得，要當日先至知。咁好啦，到咗當日都知道中午唔得，咁就問吓睇吓14:00得喇掛，點知佢哋又話唔得。其實我覺得14:00 check-in 都唔算好過份，咁後來佢哋唔得都算喇。 要留意就係個場裡面個地毯真係好舊，顏色就係啲比較老土嗰啲紅色，唔算grand，而同埋嗰新娘房超級細，應該都只係得50尺左右，計埋裡面既嘢基本上得我一個入去就得，其他人想入去就真係應該fit唔到，因為真係好細！其實我當初睇場地都無睇到新娘房，結果到場見到我自己都好surprise咁細。 到婚宴當晚都無sales同事出現。記得當時Michelle傾既時候係話過我哋婚宴當晚都會stay係我哋婚宴到既，咁佢就走咗無辦法，咁同trainee妹妹講問佢會唔會响到，佢就話“我唔會嗰喎”，而又因為當時咁啱又係婚展所以佢都要去當值做生意，佢又話“無辦法架啦”。咁無計啦，當晚sales同事响唔响到呢點都無寫落agreement到，所以都無得可以點。 好就好在當晚有一個保姆姐姐叫Emily而其它當值既同事都好好，好幫手。特別係Emily，佢好細心，例如會教我哋點樣揭頭紗，點樣攞起條裙行。又例如佢會好體諒我哋著咗婚紗會好唔方便，佢都會唔介意咁幫我綁對鞋，帶住我行，同埋教我點樣march-in，真係好貼身咁幫我。Emily唔止會照顧我，佢連我阿媽都會照顧埋，佢個人真係好好。