我係行婚展嗰時睇婚紗攝影，咁啱行過見到幾靚，又想影紅葉就揀咗呢間喺十月嗰時過咗韓國影。我唔係咁鐘意台灣婚紗攝影啲sell得太勁，都唔係咁想行埋佢哋嘅booth。 喺韓國影婚紗相係幾靚，不過中間個經歷就唔係太好。室內攝影師係韓國人嚟，好多位佢都好堅持要我跟住個sample擺返某啲pose。佢成日都要我一定要影到個standard pose先去下一個地點，所以最後都唔係影咗好多，好多時我都做唔到佢哋要嘅嗰啲表情，真係好難！我都試過出聲話不如去影吓其他，但佢就覆我話喺度再影吓先，我都唔知係咪翻譯上面出咗問題。嗰位翻譯喺用國語同我溝通，我個人都覺得我講得幾直接，但係最後都無辦法要繼續咁樣影。例如一個地點有5張唔同standard pose，佢又要我一定由第一款開始擺，又有其他新人等緊喺嗰個佈景度影，我就只可以影到第1至2款，有時其實我係想影第5款都唔會影到。到揀相嗰時就覺得真係得好少可以揀，但啲質素都OK嘅。後來我都有反映返呢件事，個翻譯就話佢都喺第一次同嗰個室內攝影師合作。都好在戶外係另一個攝影師幫手，成件事就唔同好多。