搵prewedding嗰時我同我老婆一日就上網睇吓想去邊度影相，見啲人去麗江影都好靚，就諗住去婚展嗰度再搵，點知去到婚展先發覺好多prewedding公司已經無再做麗江，所以嗰時選擇都唔多。其實大家真係要諗清楚先去婚展度confirm，因為好多公司都會迫你即刻做決定，唔會俾你諗，容易做錯決定。嗰時我哋就住有做麗江prewedding嘅公司問價，問清楚之後先知原來唔少有隱藏收費。例如外海攝影就要知道一個助手要幾多錢，嗰個攝影師係唔係喺當地請，會唔會價錢上有唔同之類。結果問完晒價之後，我哋就決定幫襯Fei Wedding，因為佢係當時價錢最好的。 由於攝影師係留喺麗江，所以我哋同助手溝通，等佢同攝影師講返。所以我哋事前唔知影相嘅日嘅行程，只知邊日去影相，同埋臨出發前先俾攝影師嘅電話我哋。當中有少少失望嘅係原來我哋之前同助手講想點影嘅嘢或地點，最後去到當地攝影嗰時，攝影師先同我哋講當時情況做唔到。但攝影師都有幫我哋，建議返我哋可以去邊度影到類似嘅感覺，所以出嚟效果都ＯＫ。相片同相簿出嚟質素都唔錯，幾滿意。

當初決定影婚紗相嘅時候，我先生就有個目標，一心想去麗江影。於是我就做research睇下去去麗江有邊啲攝影公司，好似留意到最多人提就係Fei Wedding同另外一間叫cool wedding。咁但係我上網刨文就見到cool wedding嘅comment唔係咁好，所以喺婚展就去咗Fei Wedding個counter度瞭解吓。 其實Fei Wedding嘅銷售手法都冇太大壓力，都舒服嘅，聽佢哋講解完成個package、所有價錢之後唔會迫你即刻落訂，唔會話唔俾你走。因為你知婚展最chur其實就係啲台灣公司，一入門口就截住你，係咁塞嘢落你度，坐低咗就起唔到身，但係Fei Wedding就ok嘅，會俾時間你諗同考慮。我記得後尾follow up我哋嘅同事叫阿寶。 我哋都未去過麗江，第一次去仲要係去影婚紗相，而佢哋都俾咗好多資料我哋，例如去到當哋影相，女士要注意啲咩，同埋嗰度海拔高啲，叫我哋要帶定啲咩必需品去。同埋我哋有一日會上雪山影，佢又會同我哋講話到時天氣狀況會點，會有一張checklist叫我哋睇完，叫我哋預備入面要帶嘅嘢。又會提醒我哋有啲人會出現高山反應，佢哋講話十pair人去影都會有一pair係唔舒服要落返山，影唔到。好彩最後我哋都ok，不過都真係堅凍，幾辛苦，吹到頭痛，始終影相又唔著得多衫。嗰度最主要係好大風，除咗凍之外，啲風吹埋嚟真係入骨。佢哋都有提我哋點樣保暖，打底貼暖貼，同埋帶定暖水壺裝啲熱水上去。 而揀相過程都ok，我哋係影完相之後佢啲相send返嚟香港，我哋喺香港個舖頭先再揀相。我哋個package係包哂所有相底，最主要係揀放入相薄嘅相。我知有啲攝影公司係狂叫你加相，但係Fei Wedding都冇嘅，當然都有建議下你可以加，但係揀相嘅時候冇話有太大壓力。 不過如果佢哋嘅衫款再多啲就好喇，因為so far最後我揀嘅衫就唔係100%我自己最滿意，因為佢哋就係得咁多衫，所以我都冇得點反映，就係眼見咁多衫你自己揀。同埋我先生比較大隻，所以佢去試衫嘅時候，係得一套西裝佢啱著。可能男士嘅衫佢哋都可以預返多少少size會好啲，好彩我老公都冇咩太大要求。