媽咪係心大心細啦，係中間轉左幾次都係揸唔定主意，但佢地都好好，話之後上黎再試再confirm都得！Ｄ款式無話特別多，但手工quality質素都好好！係租衫時候都會比埋配飾我揀地，襯埋件披肩比媽咪用！

Spring Wedding係我prepare所有結婚嘢嗰時幫襯嘅第一間公司，宜家睇返轉頭真係覺得自己嗰時係太衝動。初時真係睇得未夠多，又俾嗰啲「宜家你confirm先有優惠嘅package」沖昏頭腦，因為當時覺得佢無package真係貴好多。 老實講，我覺得其實佢哋嘅裙係好新同靚，但服務真係唔專業。其實嗰日我上去試裙嗰時，跟開我嗰位sales Vicky啱啱放假唔喺度，Vicky佢態度喺好好，只係我上去嗰次唔知佢嗰日會唔喺度。結果由另一位sales serve我，我問佢意見又俾唔到我，又無乜攞啲款俾我睇，只係放低部ipad俾我叫我自己睇。例如去得fitting嘅都知道店內嘅婚紗一定唔會係perfect fit，但佢真係只係求其幫我夾，就話「係咁㗎喇，到時幫你再改就啱！」對我嚟講，佢真係亂嚟，我直頭完全睇唔到條裙著出嚟個型會係點，所以當日嘅經歷真係幾差，於是我之後都係等Vicky喺度我先再過去試。 我喺呢間店總共租咗三條裙，一條for prewedding，兩件for Big day。Big day用嗰條裙其實係我喺呢間店第一條睇中，我試嗰日完全無問題，但唔知點解到真係攞裙嗰日再試就露出咗條打底褲，成條褲個形狀都出晒，真係嚇親到不得了！！我之前明明都有帶埋條打底褲去試，但又唔太記得exactly同big day當日有咩唔同，總之big day當日就係出咗咁恐怖嘅狀況，真係勁尷尬！最後只好即刻買另一條褲，因為如果唔換的話喺超光射燈之下真係成條褲邊都現晒，所以我真係覺得嗰條裙好差。其實我之後就諗唔知係唔係佢哋舖頭啲燈令我唔覺眼，因為場地啲射燈真係勁明顯，真係好在啲姊妹幫我去買到條褲返嚟。 我返去還衫嗰時都有提返吓呢件事，但佢哋就話「無理由喎，你試嗰時唔係無事咩？」我都唔知點答佢好。其實我嗰條係絹質裙，所以超貼身，我覺得著無縫內褲其實都唔ok，要好貼到好似絲襪或legging嗰種咁貼身嘅先無事。就算束褲都要留意吓個邊有無骨，唔喺都可能會現出嚟，喺呢度都當一個小貼士咁送返俾大家啦！