我爸爸係呢到會員，細㚼個會成日帶我同家姐去玩，所以我對呢個地方好有感情。而且我同老公不嬲都有係雙魚河拍拖，佢又會同我爸爸媽媽係呢到食飯同嘆下，每次入到去個感覺好relax。本身都冇諗過佢地會搞酒席果啲，不過有次係wedding expo見到佢地有promtion，於是之後去雙魚河拍拖就問佢地，原來佢地都有啲package嘅，不過就唔會有好多花臣，而且佢地淨係會做西式嘅wedding，唔會做中餐。雖然我本身諗過揀中式，但我老公就唔太想，所以其實已經得返好少選擇，咁啱知道雙魚河呢度可以擺酒所以都決定係到擺。我地擺左30圍，1000per head包酒水，包埋服務費，我地自己都有另外帶啲酒去。而且佢地唔會特別額外收費，於是傾好價錢就落左訂。 雙魚河個環境係好靚，而且係buffet黎嘅，好多野食。我地已經揀左最貴嘅package，同埋有要求佢地offer野食俾vegetarian，雖然佢地唔會額外煮多俾我地，但我地可以轉某啲餸菜，令食齋嘅人可以食多啲唔同嘅素食。佢地好早已經同我地傾左想食啲咩，而且佢有個tasting menu，要錢嘅。因為我地都食慣，好多菜式都唔洗特別去試，但冇諗到果個時段嘅西餐原來係會咁好味。 當日服務係marvelous，冇得彈。收到嘅comment都係啲野食一食完好快有人執走啲野食，態度十分優良，啲野食又好好味。本身有擔心西餐啲野食未必可以放好耐，可能會溫左幾個鐘，但係好多人都話龍蝦啊、扒啊都好好味，煮得好特別，唔同種類嘅食物都會有人讚好食，所以我地都好感激個廚師。呢個廚師本身係半島請過黎，我地已經寫左信去多謝馬會，因為真係做得好好。 outdoor擺酒要注意天氣同埋好多細節嘅地方，呢啲係indoor唔需要擔心嘅事，不過雙魚河都有contingency plan嘅，帳幕果啲都有。果陣諗，就算咁唔好彩落雨，有marquee感覺都OK嘅，但後尾有長輩嘅feedback講返原來會唔鐘意呢個後備plan，會覺得好掃興。我有諗過其實黎得outdoor應該會預左可能會有落雨嘅情況，亦都會預左落雨會有啲野可以遮一遮。我地有準備到遮果啲嘅，但我地都overlook左落雨就有機會俾蚊咬，個場方面都有同我地講返，所以之後就預備左好多有機噴霧擺定係到，好彩唔需要用。不過其實都要睇地方嘅，有啲outdoor可能係假草皮嘅就唔需要咁擔心，真草先會俾蚊咬。