Riko係朋友介紹，我太太睇完相之後又試埋妝，覺得啱佢style就決定用佢。太太之前都睇咗十幾間，都做咗好多research，不過真係試就淨係試咗Riko，一試就啱。試妝嗰日我都有陪太太，Riko都好nice好friendly，亦會主動令氣氛舒服啲。試妝當日，佢都同我哋分享咗唔少經驗之談，提醒新娘子有啲咩地方需要留意。 到big day當日，我見Riko同我太太之間互動好好，我都好滿意！嗰日太太同化妝師傾計仲多過同我！我覺得Riko令到我太太當日好放心，呢一點都好重要。我都好滿意太太嘅妝，都係佢想要嘅嘢。同埋Riko手腳都好快，跟足哂客人想要嘅rundown同時間。

Riko係朋友介紹俾我嘅。我自己不嬲都想化啲比較韓式嘅妝，簡單啲，個樣自然啲。其實之前都揀過另一個化妝師，係我家姐之前結婚用過，都諗過去試完就Confirm。有個朋友啱啱學緊化妝，叫我俾塊面佢玩，我就俾佢試完之後，佢就話：「你想試啲韓式啲嘅妝，不如搵我師父啦，我跟過佢學過一兩堂化妝架。」於是佢就介紹咗Riko俾我。之後就上網睇過佢嘅作品就覺得Riko好似俾我家姐個化妝師更加好。因為我家姐用嗰個冇咩放相上Facebook，冇咩作品睇，而且我又唔想試咁多次。所以試完Riko之後覺得得喎，於是就直接confirm咗。 因為我籌備時間好足夠，所以好早就試咗妝。由我試妝到Big day期間Riko都有俾意見，我都有問過佢嘢，佢都有覆我。例如我俾錢嘅時候都已經有張約，其實都寫咗啲Details落去。臨結婚之前一兩個星期佢都有whatsapp send一大段嘢俾我，叫我點樣準備。佢有提過我點樣去護理，類似係結婚前點樣準備自己。同埋我結婚之前想電曲髮，我都有問Riko意見。佢都有覆我話ok，不過就叫唔好電負離子，因為頭髮會難set。 Big day當日佢助手好準時到，不過佢就差唔多遲咗半個鐘。佢同我解釋係話的士司機搵唔到地址。我住公屋，因為有好多幢，佢仲要坐紅的，紅的未必知邊一幢打邊一幢，所以兜咗好耐都搵唔到喺邊。雖然佢遲咗，不過我又覺得ok嘅，佢都有交帶，因為始終佢助手到咗，佢喺未到之前助手有同我解釋佢嚟緊，不過係的士兜唔到入嚟，同埋助手都有幫我化緊個底妝同埋整緊個頭先，所以我都覺得接受到。 Riko轉妝轉得好快！尤其是當日啲時間，你自己都唔會有時間睇錶。但係之後聽返兄弟姊妹或者來賓講，都話唔會話無啦啦唔見咗我一段時間，成日都見到我喺台度，唔會特登匿埋咗要轉妝或者換衫，所以我都幾proud of佢，時間掌握得幾好。 我都有外影，喺返婚宴場地郵輪碼頭出面影，當中有段小插曲，係酒樓應承我俾間新娘房我化妝，但係之後個場俾人book咗嚟做event，唔肯放間房俾我，最後Riko要喺經理室度幫我化妝同埋換衫。但係間房唔係密封，係有啲簾加落地玻璃咁，如果人哋有心裝係會裝到，Riko同佢助手就好快手咁幫我換衫，唔係佢哋幫我都唔知點樣換得咁快。 Riko轉妝同set頭都好快。其實當日我個人好亂，之前都有諗過大概個頭想點set，Riko都有問過我，我都俾咗啲相俾佢睇，但臨場唔知係咪佢見到我啲衫，佢就再問我係咪真係想跟之前咁set，我就叫佢揸主意，因為我都好亂都唔知自己想點。我就放心俾佢搞，出到嚟個效果好好。