我哋嘅Big Day攝影係由Nature Wedding嘅Matthew負責，但我其實係喺百利嗰間度落單。知道Nature Wedding嘅話，可能就會覺得奇怪，因為Matthew主要係喺銅鑼灣嗰邊，所以其實我呢張單係有段小插曲。 一開頭，我經過Nature Wedding嗰時，見入面有個男仔，覺得佢影啲嘢OK就返屋企上網睇吓間嘢有無入到黑名單。我上網睇完，覺得啲作品都好好，又無話係黑名單，所以隔咗一個星期之後就book咗。大約結婚前9個月，我就已經book好，到臨結婚前嘅兩、三個月，我就再同佢哋聯絡。其實一直都係有個叫阿Will嘅男仔同我聯絡，我自己就無上過Nature Wedding個facebook度message佢哋。嗰時我就問佢係咪會幫我整成長片段，使唔使俾相佢之類，佢就話「你可以呀！你EMAIL俾我啦。」跟住，我又問佢使唔使出嚟同佢傾下rundown嗰啲，佢就話「好丫，咁我約你睇下邊度方便，搵間coffee shop傾吓。」嗰吓我就開始覺得好奇怪，點解唔係去返舖頭要約出去傾呢？於是我就上Nature Wedding個facebook度睇吓，咁啱佢哋新年開年飯有張相，我就唔見入面有嗰個男仔，就覺得更奇怪。我就即刻喺facebook度message佢哋，send咗張底單俾佢哋，問吓佢哋舖頭係唔係知道有我呢張單。好在之後Matthew佢覆返我哋話big day嗰日嗰個時間OK， 佢會幫我哋跟返。原來Will之前係其中一個徒弟，但後來就無合作，佢已經自己出去開咗另一間公司。然後Will嗰邊我都無再聯絡，Matthew佢話佢會幫我同嗰邊講，自己再跟返我哋張單。成件事我都係到結婚2個月前先知道，好在嗰時係淡季，Matthew佢可以幫我哋follow返。我老公就話其實可能當時Matthew唔係好知有呢張單。我後來都有上facebook度睇過Will嘅page同作品，都靚嘅，但係我真係覺得佢嘅誠信好有問題。另外，其實我之前一直睇Nature Wedding facebook嘅相都係Mathew影，所以一直都係睇Matthew嘅作品，所以都覺得好彩Matthew可以幫我哋跟返張單。 到結婚嗰日，佢哋準時8點到無早到，然後就幫我哋set嘢，都係啲正常流程。我記得嗰日好好天，因為海濱長廊嗰度真係好熱，影外影嗰吓我都有啲發脾氣。我哋有朝拍晚播，佢叫我企喺海邊度，撥下頭髮，我又唔係好知佢想叫我做咩。我又唔係做演員，唔知佢慢鏡定縮影，即係影成分鐘之後得10秒嗰種，佢就係咁叫我「繼續啦！繼續啦！」咁樣，我真係有少少躁。雖然我都知佢要追住我哋嚟拍嘢係仲辛苦過我，但我嗰時真係心諗「做乜嘢啫宜家？」。剪片嗰時佢哋都剪咗好耐，原本到食翅嗰陣就要播，但佢哋都未剪好，我已經要去換送客套衫。於是我就同佢哋講「唔緊要啦，我唔睇，換衫嗰時照播啦！」但佢哋就話唔好，想我哋都一齊睇，同我講「你宜家去換衫，換完出嚟就得架喇！」。其實嗰一刻我又心諗點解要我一齊睇呢？不過，原來真係好有意思，佢key返我證婚嗰段聲，然後影住我老公過嚟拖我。嗰刻終於覺得原來嗰時喺海旁企咁耐都係有意義，即刻都覺得自己錯怪咗佢哋。全日嚟講Matthew都好OK，講嘢好大聲好清楚，反而係幫我哋錄影嗰個男仔就好細聲，有時我都唔係太聽到佢講咩。可能喺海旁嗰時佢有話俾我知要做咩但係我聽唔到都未定。嗰晚之後，我有啲朋友問我同個攝影師係唔係本身識，話覺得佢哋同我哋2個好似好friend，好熟咁！