當初會揀佢地，係因為一直有留意佢地Facebook，見到佢地婚攝嘅風格同我都好夾，我都好鐘意佢地攝影風格。我本身對佢地充滿信心，所以佢係我地決定要結婚之後第一間拍板嘅公司。但可能我本身對佢地期望太高，失望亦都越大。 我地響婚展二話不說就決定咗呢間，當時要畀一半錢，出發前可以選擇過數或信用卡畀埋尾數，如果過數就要臨出發前一個月清還尾數，信用卡就可以到韓國先畀。職員都好貼心地提我地信用卡嘅rate較高，但我都係決定用信用卡。之後佢就開咗個whatsapp group，裏面有我、我老公、香港agent同韓國agent。出發前一個月，佢突然send whatsapp叫我要過數，因為韓國果邊嘅信用卡服務已停止，我質問佢點解最後一個moment先講，佢解釋佢都係最近先知，啲對答嘅語氣仲要好倔，令我好hard feeing，差唔多嗌交咁濟，！於是佢開始驚咗我，我再追問之下，佢啲語氣都仍然好差，都係堅持要過數，但主動將截數日改後幾日，咁我都明白可能佢地多客，忙得濟唔記得提我，落咗啖氣就過咗數畀佢，但佢地啲PR真係好唔掂。我自己都係做服務業，知道「今時今日咁嘅服務態度真係唔得！」我地之間嘅對答搞到好唔愉快，我地有一日又係問佢地問題，之後佢地竟然響我地個whatsapp名後加上3粒星星，咁即係標籤咗我地好麻煩客人囉！呢啲咁低劣嘅手法我都係第一次見！ 好啦，錢都畀哂，洗濕咗個頭只好繼續行程。婚紗攝影成個過程分成兩日，第一日先去試衫，第二天去影相，而兩日嘅翻譯唔係同一個人，第一天果位翻譯幾好，一早就幫我預備好哂time table、行程、注意事項等資料，但係第二位就激到我爆炸！ 拍攝當天，我地先去美容室上妝，韓國agent另外仲安排咗一位負責幫我轉妝同換衫嘅助手姨姨，仲有一位馬來西亞翻譯跟住我。果位助手姨姨好好人，佢完全唔識中文，但我本身識少少韓文，所以都勉強溝通到，而翻譯只係學生，本身我都覺得冇咩嘢，但去到拍攝嘅時候，個翻譯竟然完全失蹤！我雖然識少少韓文，但有時攝影師同助手姨姨會問一啲複雜啲嘅問題，我就未必明。結果竟然要韓國果邊嘅工作人員去搵佢返嚟，我心諗有冇咁離譜呀！ 人差都唔緊要，最多唔傾計，但行程安排亦係九流。其實職員最初都有同我地講，拍攝當天行程會好趕，未必有一個正式嘅食飯時間，我地亦都理解，但冇諗過係連一齊食嘅時間都冇！拍攝當日，我響studio入面見到同時有5對新人影緊，我留意到人地可以坐埋一齊食飯，所以我一直以為我地都係咁樣。拍到中段，我已經好攰，換好衫出嚟等緊轉景嘅時候同老公呻咗兩句，佢先突然同我講佢地竟然已經食咗飯！！！而且係連翻譯都食埋，老公仲話其實係趁空檔嘅時候自己攞飯嚟食，我心諗個翻譯點解唔早啲同我講呀！最令我爆炸嘅位係，我地等緊轉景嘅時候，佢竟然撻咗響我後面瞓覺囉！ 出發去韓國之前，我都有諗過不如買啲香港手信過去送畀啲工作人員，當慰勞佢地，但後來時間關係冇買到，諗住響附近買啲咖啡答謝佢地。拍攝前一天我特登問咗第一日嘅翻譯，影樓附近有冇coffee shop，佢都話應該有，拍攝果日都有同第二位翻譯講，拍攝中段我託佢出去買，佢話附近冇coffee shop，但我明明見到另外啲新人係飲緊咖啡㗎！而且當我地離開影樓嘅時候，我先發現exactly隔離幢樓就係餐廳！ 雖然第二日嘅翻譯真係好差，但其實其他工作人員包括攝影師、助手姨姨同第一日嘅翻譯都好好人，好似果位攝影師，可能serve過好多香港人，所以識講少少廣東話，而我又識少少韓文，但亦都可能係咁，個翻譯見到我地勉強溝通到，就走咗去唔知邊到！拍攝過程中，我地有個大袋裝住所有隨身物品，但全程都係我老公拎嘅，所有人都顧住拍攝已經好忙，但個翻譯行行企企咁，完全冇幫下眼睇住袋野，如果我地啲嘢唔見左唔知邊個負責呀！ 拍攝完之後，工作人員車我地返酒店，個翻譯去到中途竟然叫個司機放低佢，佢自己搭巴士返屋企，掉低個客同個完全唔識其他語言嘅韓國人司機自己走咗去。如果中途出咗咩事，我都唔知點算。其實影緊嘅時候我都有同佢傾計，知道佢原來只有一個月嘅工作經驗，公司亦都冇乜培訓，只係叫佢跟一兩次就要接job做，可見呢間公司招聘同培訓都好參差。成個婚攝都係極唔愉快嘅氣氛之下完結咗，返到香港，個惡夢都仲未完，售後服務亦都奇差。 我地買嘅package包咗一本studio相簿，另一本就係Jun 6送畀我地嘅相簿，兩本都有30張相，仲包咗由翻譯影口花絮相同一段花絮片段。 先講兩本相簿，studio果本我地來回comment咗好幾次，所以冇咩問題。而Jun6送果本，職員一早講咗只會執人唔會執景，而且只可以執一次。而其中我地揀咗一張響天台景到影嘅相，背景有啲假櫻花樹，但因為攝影前一日太大風吹冧咗啲樹，啲職員用條藍色繩綁住啲樹，我地本身都擔心會唔靚，但當時職員就話可以幫我地key走，咁我以為萬無一失啦！到我返到香港同佢講叫佢執咗條繩同啲路人嘅時候，佢竟然一口拒絕！其實要執嘅相只有兩張，我都已經唔係叫佢執哂三十張。我反問佢接唔接受到婚紗相簿入面啲相有藍色繩，佢都唔知點答我，之後佢先再話同韓國果邊商量，最後去到差唔多要嗌交佢先肯幫我執囉！另外，因為呢本嘅執相公司同Studio果本嘅公司係兩間唔同嘅公司嚟，所以啲色差對比好大。我明白每個人修圖嘅style都唔同，但冇理由啲質素相距咁大，最後我自己搵咗淘寶啲設計師幫我執完，之後send返畀佢地幫我印，費時再同佢交流。 到花絮相，又係一肚氣！出發前我聽過其他用過呢間嘅朋友講翻譯會幫新人用手機影少少花絮，當日我都有問佢，但佢一直堅持用佢部單反影，仲話可以第二日可以send返啲相畀我地。到之後我收到啲相，簡直令我眼都突埋！全部唔係out focus就係角度核突，影咗四百張花絮，得果幾張用得！ 最後到花絮片，本身簽訂單果陣講明可以整到好似mv咁，但到差不多攞得相嘅前一個月，佢先同我講話韓國果邊嘅製作公司嘅老闆走咗佬，佢仲話如果9月前都搵唔到個老闆，就會退錢畀我。到咗9月，佢地都仲話未搵到，所以我叫佢不如唔好等，直接過返數畀我，佢又玩語言偽術，話佢之前講嘅係︰「9月之內畀返你，唔係宜家！」言下之意係月尾，咁我都算啦，反正都鬧得咁唔開心，我都唔想再糾纏落去，畀咗個恆生戶口號碼畀佢，佢之後又耍我，話過數的話只可過匯豐，因為韓國果邊只可電匯去匯豐，再轉去恆生要收15蚊手續費。我心諗有冇搞錯，恆生匯豐唔係互通㗎咩？？？再者，其實我已經冇咗一段一生人得一次嘅紀念同回憶片段，呢啲咁濕碎嘅錢，你地公司自己waive咗佢，又或者用其他方式過戶都好，都唔係太過份掛！ 到最後我真係忍無可忍，爆咗佢一鑊，完全唔知點解所有涉及佢地公司嘅部分，都係令我失望，其他好似韓國攝影師同助手都好好，其他由準備出發到執相，每個環節都有令我嬲到爆炸嘅位，到最後都話過數要照減15蚊，攞相果陣畀返cash我。本身我都想去投訴，但發覺佢都係叫我send返email去佢地果邊，即係話都會不了了之啦！其實我都唔係要求佢地去做啲超出佢地工作範圍嘅嘢，而且價錢數目都唔細，講緊幾萬蚊以上，我完全唔明點解啲sales講野可以咁差，大家唔想要一個開心嘅pre-wedding又畀佢facebook上啲相吸引到嘅話，真係要三思！