我係上網搵到呢間公司嘅，不過其實佢又唔講得上係一間公司，因為係得一個攝影師。一開始係喺Facebook搵佢哋，我睇到佢幫其他新人影嘅相，又真係好靚。所以雖然中間我哋冇見過面，佢直接send個price過嚟okay我就俾訂，跟住就約好拍攝日期，當天直接在拍攝地點澳門見。 其實呢間公司係可以選擇另外加錢包埋婚紗禮服，但我覺得又要試又要借衫還衫好麻煩，所以就自己準備喇。 拍攝前一晚我book咗酒店，到第二日朝早化妝師就嚟酒店幫我化妝。嗰日化妝師最先到，幫我化完妝之後攝影師就到，而拍攝過程由一個攝影師同一個助手負責。一開始化妝時，化妝師都有問我想點化，但係化出嚟我就覺得麻麻地，因為佢化呢個妝唔係俾你個人睇係俾你過鏡嘅，但係我比較番之前試過在韓國影相個妝，上鏡好睇而自己睇落又舒服，就會有個比較。因此個妝真係麻麻地，好影響自信心，所以影出嚟都有少少唔係咁滿意。不過我本身又唔會好直接同人講有咩問題嘅人，所以都係吞咗佢算。 出發前，佢哋會喺酒店幫我影幾張相先，跟住就再出去開始外影。當日我哋去咗漁人碼頭﹑科學館同埋水庫吊橋，攝影師阿偉都影得好落力嘅，佢都會睇你意見，亦都會教你擺pose，可能係拖住手行或者鼻貼鼻咁樣，都影到差唔多六點幾七點。影完之後佢哋直接去碼頭搭船返香港，而我哋未走，所以我哋就分開走。 最後隔咗一個月就有相揀，都覺得好難揀，因為張張都唔係好滿意，始終覺得冇咁自然，同喺韓國影studio好唔同，佢哋會教埋你擺pose，個pose擺出嚟係一定好睇。影outdoor就好睇佢捕唔捕捉到，又或者可能唔可以完全依賴攝影師。當日最影響我一嚟係妝啦，二嚟係裙，條裙正常化妝師會幫你綁，佢又唔係話綁得好好，變咗好似成日會「凝住凝住」咁，應該要綁得好緊貼身啲影相先會靚架嘛，佢就做唔到。 佢叫我揀30張再拎去修圖，之後okay嘅話就再排版影相，我自己對呢輯相都失望就諗住都算啦，求奇揀30張俾佢求奇收貨咁。 不過佢本身都唔平，個plan係$7800，再加埋啲船飛酒店包車都萬幾蚊，因為影漁人碼頭一係就要俾錢一係就租酒店，所以當時就租咗萊斯酒店，加加埋埋條數都唔少！