我喺婚展度book佢哋，因為我有個朋友喺入面做係拍video嘅，佢介紹我，同埋我都俾佢張poster吸引咗，我覺得好靚。可能因為喺婚展嘅關係，佢哋要追數所以都幾hard sell。佢講嘅嘢都係迫你join，但係我都真係好鍾意佢影嘅嘢，如果我唔鍾意佢點迫我都唔會join。 佢哋俾我揀邊度影相，我哋最終揀咗去咗摩星嶺、上環同埋元朗。去元朗係因為佢哋自己本身有個private嘅哋方，有啲自己做嘅花圈，我覺得好靚所以去咗嗰度影。衫都係佢哋提供，但係就唔ok，我都係勉為其難先終於揀到一套。其實本身揀咗兩三套，但係佢影之前嗰幾日先話我知件衫唔啱我著，後尾搞到就要改期，我真係好嬲好嬲。後尾就話不如另外join多個日子，佢free多一part俾我影，我都唯有係咁，唔係可以點，因為都冇衫。我後尾再去租衫個舖頭租多另外一件，都唔太鍾意嘅一條裙，影咗就算。 而拍攝效果方面，雖然我未拎相，但睇過preview都覺得幾靚。 不過可能佢哋細公司，我覺得佢哋冇咩人去follow啲嘢，好多嘢都confuse唔知點做，佢都幫唔到你。我都係搵返個攝影師，但係佢又要兼顧好多嘢，未必成日得閒理我哋，我哋影完啲相話要改圖等等，我哋又唔識，問佢佢又隔好耐先覆。到我哋要upload啲相，啲程式我哋唔識用諗住問佢，但係佢又唔係點覆，因為佢好忙。本身佢係應該教我哋點樣用程式upload啲相俾佢，最後我哋直接喺whatsapp度打啲number俾佢。