L Ming係同月份結婚嘅女仔group入面有個女仔影咗，放咗上婚網。佢放完之後，真係全城哄動，好多人follow同埋想影，我就係其中一個。我本身都想喺香港影一輯，因為我同老公係中學識嘅，想返中學影一輯。本身諗住拍膊頭搵以前幫我影相啲friend影，後尾見到L Ming咁平，就諗：「算啦！嗰幾千蚊唔好慳！」於是就搵咗佢哋影，結果真係返咗學校影。 呢輯相令我印象好深刻，因為我哋喺香港49年來最凍嗰日影，得2度，凍到死又毛毛雨。我哋學校喺大埔，背住山，又冇咩高樓大廈，好食風。我哋夜晚仲去埋科學園影，我都覺得自己好癲。拍攝當日攝影師同佢助手都好Take care我哋，叫助手好快幫我哋除衫影，影完即刻又幫我哋著返衫。 我哋都係影相當日見面，揀相佢都係send相俾我揀。執相速度都快，唔洗點催。我覺得作為攝影師佢係好有heart嘅，始終一個新人，佢比起我wedding影相，你感覺到佢影嘅時候係有團火。冇搵佢影big day係因為始終佢係新人，pre-wedding影得唔好都可以再嚟過，不過big day我又唔敢搏，所以搵咗個比較資深啲嘅攝影師。之後我睇返佢big day相我覺得ok，因為始終big day有好多走盞位，需要經驗，我諗佢接多一兩年之後都會係一個幾好嘅攝影師。 反而佢哋化妝師Ruby我覺得麻麻，我知道佢係攝影師女朋友嚟嘅，佢哋拍住上嘅。我開頭係影校服，但係個妝係同我整體個look唔襯，太濃，覺得好怪。之後我有friend搵佢影嘅，事隔半年至一年左右啦，我睇咗個妝又覺得ok，進步咗！