我哋係通過朋友介紹而知道Lost Stars嘅，之後再自己去了解多啲。我哋喺plan個cocktail party嘅時候就好想搵有音樂呢個元素嘅場地，因為覺得有音樂會熱鬧啲😄。最後搵咗好多間，考慮埋場地佈置裝飾、食物質素、價錢，都覺得呢間係最適合嘅。佢哋價錢方面好抵，出面其他間無咁多配套嘅sound system，要再額外自己出錢請人去裝機，加埋個價錢就比Lost Stars高好多。我哋都有去site visit，睇下啲環境同裝飾，最終就決定咗呢間。佢哋嘅團隊都同我哋年紀相若，所以會比較啱傾，佢哋都會明白我哋想要啲咩。由一開始傾佢哋都好配合我哋一切嘅要求，我哋未諗到嘅嘢佢哋都已經會offer咗俾我哋。音響同食物嘅安排都會一早send俾我哋睇，我哋有咩特別要求佢哋都會儘量改。當時Lost Stars都係啱啱開業，我哋都好開心佢哋好盡力幫我哋搞個party，無令到我哋失望😊。去到當日個場地都好妥當，時間配合都好好，啲嘢食嘅質素都好好，賓客都好鍾意。佢哋都有準備個類似新娘房嘅地方俾我哋化妝換衫，同安排一位assistant睇住我，新娘當日係好難兼顧到太多嘢，assistant都會好細心，幫手留意到啲好detail嘅位，譬如見到酒就飲完會即刻幫我添，會拎啲嘢食過嚟，又會一直跟住我睇我有咩需要，我都好滿意。當日我自己都有搵咗隊band同可以影photo booth嘅單位搬部機過嚟，衫都係我自己喺出面租嘅。咁我就覺得佢哋可以同其他商戶合作，提供啲一條龍嘅option。我都有留意到佢哋依家都有同啲珠寶公司合作，可以俾啲新娘揀，咁就會更加方便啦。總體嚟講我哋都非常滿意Lost Stars嘅服務👍🏻。